راولپنڈی:آرمی چیف نے جنرل عاصم منیر نے کہا ہے کہ دہشتگردی کیخلاف جنگ میں پاک فوج کے جوانوں نے بڑھ چڑھ کر حصہ لیا۔فوجی مشقوں اور مقابلوں سے ایک دوسرے کے تجربات سے سیکھنے کے مواقع ملتے ہیں۔مشقوں سے پیشہ ورانہ فوجی اور حربی مہارتیں بہتر ہوتی ہیں۔ان خیالات کا اظہار انہوں نے گزشتہ روز کھاریاں گریژن میں ساتوں پاکستان آرمی ٹیم سپرٹ (PATS) مشق 2024 ء کی اختتامی تقریب سے خطاب کرتے ہوئے کیا ۔ان کا کہنا تھا کہ ایسے مقابلے جوانوں کی صلاحیتوں کومزید بہتر بناتے ہیں،ایسی مشقیں پاک فوج کے کردار ،عزم اور قابلیت کاخاصا ہے ۔آرمی چیف جنرل عاصم منیر نے مشقوں میں بہترین مہارتوں کے مظاہریکی تعریف کی ۔آئی ایس پی آر کے مطابق ساتویں پاکستان آرمی ٹیم سپرٹ (PATS) مشق 2024 کھاریاں گیریژن میں ایک شاندار اختتامی تقریب کے ساتھ اختتام پذیر ہوگئی۔ چیف آف آرمی سٹافجنرل سید عاصم منیر اس موقع پر مہمان خصوصی تھے۔مقابلوں کے شرکا ء نے 60گھنٹوں کی سخت پیٹرولنگ مشق میں حصہ لیا،مشقوں کا مقصد تجربات کے اشتراک کے ذریعے جنگی مہارتوں کو بڑھانا ہے۔مشق میں پاک فوج کی سات ٹیموں اور دوست ممالک بشمول بحرین، اردن، قازقستان، سعودی عرب، مالدیپ، مراکش، قطر، امریکہ، ازبکستان، سری لنکا، تھائی لینڈ اور ترکی کی پندرہ ٹیموں نے حصہ لیا۔ آذربائیجان، چین، جرمنی، انڈونیشیا، مملکت سعودی عرب اور میانمار نے بطور مبصر مشق کا مشاہدہ کیا۔پیٹرولنگ مشقیں 25سے27فروری کے دوران نیم پہاڑی علاقوں میں کی گئیں۔ گزشتہ برسوں کے دوران، مشق نے دوست ممالک کے لیے پیشہ ورانہ فوجی سرگرمی کے طور پر بہت اہمیت حاصل کی ہے۔آرمی چیف نے نمایاں کردار ادا کرنے والے جوانوں اور ٹیموں میں انعامات تقسیم کئے،آئی ایس پی آر کے مطابق تقریب میں بین الاقوامی مبصرین اور دفاعی اتاشیوں نے بڑی تعداد میں شرکت کی ،آرمی چیف کی آمد پر کورکمانڈر منگلا نے استقبال کیا ۔
