راولپنڈی:سیکورٹی فورسز نے پاک افغان بین الاقوامی سرحد پر دہشت گردوں کی دراندازی ناکام بنا دی۔آئی ایس پی آر کے مطابق سیکیورٹی فورسز نے 7 دہشت گردوں کی نقل و حرکت کا پتہ چلنے پر شمالی وزیرستان کے علاقے سپن کئی غلام خان میں کارروائی کی۔ سیکیورٹی فورسز کی جانب سے دہشت گردوں کو گھیرے میں لے لیا گیا، سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔ سیکیورٹی فورسز کی کارروائی میں 7 دہشت گردوں کو ہلاک کر دیا گیا ۔ ہلاک ہونے والے دہشت گردوں سے بڑی مقدار میں اسلحہ اور بارودی مواد برآمد کیا گیا ہے ۔پاکستان بارہا عبوری افغان حکومت سے موثر بارڈر مینجمنٹ سسٹم لاگو کرنے کا مطالبہ کر چکا ہے۔ ترجمان پاک فوج کے مطابق توقع ہے کہ عبوری افغان حکومت اپنی ذمہ داریاں ادا کرے گی ،توقع ہے کہ عبوری افغان حکومت پاکستان کے خلاف دہشت گردی کی کارروائیوں کے لیے اپنی سرزمین کا استعمال روکے گی، پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پرعزم ہیں۔ پاکستان کی سیکیورٹی فورسز اپنی سرحدوں کو محفوظ بنانے کے لیے عزم مصمم رکھتی ہیں۔
