اسلام آباد: وفاقی وزیر عبدالعلیم خان نے کہا ہے کہ اللہ تعالیٰ کے حضور سربسجود اوراین اے 117کے عوام کا شکریہ ادا کرتا ہوں،وطن عزیز کی بہتری اور لوگوں کی فلاح و بہبود اولین ترجیح ہوگی، استحکام پاکستان پارٹی حکومت کے ساتھ مل کر مسائل حل کرے گی۔ان خیالات کااظہار انہوں نے وزارت کا حلف اٹھانے کے بعد غیر رسمی بات چیت کرتے ہوئے کیا۔ان کا کہنا تھاکہ وعدے پورے کرنے کے لئے پہلے دن سے ہی کام شروع کردیں گے۔سیاست اور اختلافات سے قطع نظر ہمیں صرف اور صرف ملک کا سوچنا ہے۔ملکی معیشت کی بہتری اور عام آدمی کو ریلیف ہمارے لئے اہم ترین ٹاسک ہے۔ اس ماہ مقدس میں مستحق اور غریب افراد کا خاص طور پر خیال رکھیں۔ اسرائیلی ظلم و ستم کا شکار فلسطینی ان دنوں خوراک اور پناہ کی تلاش میں ہیں۔اس مبارک مہینے کے صدقے اللہ تعالیٰ فلسطینیوں کی مشکلات دورفرمائے۔
