پشاور:چیف سیکرٹری تعیناتی کے معاملے پر وزیر اعلیٰ علی امین گنڈاپور کے مشیر برائے اطلاعات و تعلقات عامہ بیرسٹر ڈاکٹر سیف نے اتوار کو جاری ایک بیان میں کہا ہے کہ چیف سیکرٹری کی تعیناتی پر وفاق کو اپنی ذمہ داری کا احساس ہونا چاہیئے، مرضی کی ٹیم ساتھ رکھناوزیر اعلیٰ کا حق ہوتاہے۔ پنجاب، سندھ اور بلوچستان کو مرضی کے چیف سیکرٹریز دئیے گئے تو خیبرپختونخوا کو کیوں نہیں دیا جارہا ہے۔مشیر اطلاعات کا کہنا تھا کہ خیبر پختونخوا کے موجودہ چیف سیکرٹری اچھے اور قابل بیوروکریٹ ہیں،ہمیں ان سے کوئی ذاتی اختلاف نہیں۔ ان کا کہنا تھا کہ خیبر پختونخوا میں ہماری حکومت سے افسران بھی اپنی مرضی کے لگانا چاہتے ہیں کیونکہ حکومت ہم نے ان افسران کے ذریعے چلانی ہے۔ مشیر اطلاعات کا کہنا تھا کہ وزیر اعلیٰ نے وزیر اعظم سے ملاقات میں بھی چیف سیکرٹری کی تعیناتی پر بات کی تھی لیکن وفاق معاملے کو متنازعہ بناکر سیاسی طور اچھال رہا ہے۔مشیر اطلاعات بیرسٹر ڈاکٹر سیف کا کہنا تھا کہ وفاق خیبرپختونخوا کیساتھ اوچھے ہتھکنڈوں پر اتر آئی ہے ہم ان سے باہر کا نہیں بلکہ اپنے ہی ملک کا بیوروکریٹ مانگ رہے ہیں۔
